Fylkesmannen i Rogaland

Fylkesmannen i Rogaland støttar lovforslaget. Lovforslaget legg til rette for at kommunane, fylkeskommunane og IKS-selskap i størst mogleg grad kan halde fram med verksemda som normalt. Dette er viktig i den nye usikre kvardagen som følger av koronasituasjonen, der smittesituasjonen og påfølgande tiltak kan endrast dagleg. Vi har nokre kommentarar til forslaget:

Fylkesmannen deler departementet sin føresetnad om at dei folkevalde er bevisst ansvaret dei har for å passa på at uvedkommande ikkje blir kjende med opplysningar med teieplikt. Dette kan gjerne tydeleggjerast i ei eventuell rettleiing til lova eller i lovførearbeida. På sama måte deler vi departementet sine forventningar knytt til kommunane og fylkeskommunane sitt ansvar for å sikre trygge løysingar som gjer at uvedkommande ikkje får høve til å logge seg på møte dei ikkje har rett til å delta i.

Departementet har mellom anna fått innspel om at den usikre smittesituasjonen tilseier at det bør vere utvida høve til fjernmøte, men òg at det tar lang tid å innhente fysiske signaturar på grunn av redusert postombering. Redusert postombering er ei permanent løysing som i utgangspunktet ikkje bør grunngje ei mellombels lov. Det auka behovet for å innhente fysiske signaturar per post verkar likevel å vere knytt tett opp mot behovet for fjernmøte.

Harald Thune ass. fylkesmann

Monica Nessa avdelingsdirektør