Høyringssvar Dato: 09.06.2017 Svartype: Med merknad Kvam herad meiner at Arbeids- og sosialdepartementet sitt forslaget til forskrift i liten grad vil bidra til å oppretthalda avlastningstilbodet i Kvam herad på det nivået som det er i dag. Kvam herad har pr i dag organisert avlastningtilbodet til familiar i tre ulike former: avlastning i institusjon, bruk av private avlastarar der avlastning skjer i private heimar og avlastning gjennom bruk av besøksheimar (barnevernet). Avlastning i institusjon er organisert ved bruk av fast tilsett turnuspersonale, medan private avlastarar og besøksheimar har hatt oppdragsavtalar. Kvam herad har lønna oppdraga etter ein timesats med tillegg av feriepengar, men har ikkje rekna oppdragstakarane som del av tenestepensjonsordninga i kommunen. Barnevernet har brukt KS sine satsar for avlønning av besøksheimar. Kvam herad ser at i ein forholdsvis liten kommunen som Kvam, får «Avlastar II dommen» store konsekvensar for tilbodet til brukarane og familiane deira. Det er difor svært bra at departementet ønskjer å finna nødvendige juridiske løysingar på dei utfordringane som er oppstått etter avlaster II dommen. Utfordringar som i første rekke rammar den som mottek avlastning, dvs. brukar og familien hans/hennar. For Kvam herad sin del, ser me det som svært sannsynleg at dommen vil medføra at fleire brukarar vil mista tilbodet sitt slik det er i dag. Hovudutfordringar for Kvam er at mange av dei som utfører avlastning eller er besøksheim, også har ei ordinær stilling i kommunen. Forslaget til forskrift vil difor i liten grad bidra til å oppretthalda avlastningstilbodet i Kvam herad på det nivået som det er i dag. I Kvam har rekruttering av avlastarar og besøksheimar i alle år og i stor grad vore avhengig av kommunetilsette. Dette er personar som i fleire tilfelle også er i familie med brukar og som ser oppgåva si som ein meiningsfull og viktig samfunnsinnsats. Ein føresetnad for å bli avlastar er for dei aller fleste at det kan kombinerast med avlastar sin ordinære jobbsituasjon og ikkje går ut over denne. Kvam herad har for tida 12 barn/familiar som har avlastning i private heimar og 20 besøksheimar (dette er også private heimar). Nokre få familiar ventar på tilbod fordi kommunen har ikkje klart å skaffa avlastarar. Åtte av dei tolv som mottek avlastning i Kvam, får tilbodet i heimar der avlastar også har si ordinære stilling i Kvam herad. Tre av dei er tilsett i 100% i hovudstilling, fleire er tilsett i høge stillingsprosentar og vil måtte redusera hovudstillinga, dersom dei skal halda fram som avlastarar. Avlastningstilbodet er i det vesentlege helgeavlastning på 48 timar. Ved krav om 16 timar samanhengande fri før og etter avlastninga, vil det bety at avlastar må søkja om at arbeidsgjevar tilpassar arbeidstida i den ordinære stillinga. Kvam herad er tvilande til at avlastarane ønskjer endringar i hovudstillinga si for å kunne halda fram som avlastar og fryktar at dette vil medføra at dei ikkje vil halda fram som avlastarar. KS har vist til fleire døme på utfordrande situasjonar der turnuspersonell er avlastarar og støttar KS si uro i forhold til grenser for vekentleg arbeidstid og krav til kviletid og samanhengande fri. Fleire av avlastarane i Kvam herad arbeider turnus, og dette er i høgste grad reelle problemstillingar. Kvam herad ønskjer som eit minimum at kravet om 16 timar arbeidfri før og etter avlastning som overstig 24 timar, vert fjerna i framlegget til forskrift. Stabilitet er svært viktig for familiane som mottek avlastning. Å tilby avlastning i fleire heimar, t.d. i løpet av ei helg eller ein ferie, vurderer kommunen som utilrådeleg. I nokre tilfeller har barnet vedtak om x antall avlastningsdøgn i året for at det skal vera mogeleg å planleggja ein lengre tur eller tettare avlastning ein periode. Når departementet skal arbeida vidare med løysingar for ferieavlastning, er det viktig at det blir mogleg å avtala fleksible løysingar. For å oppretthalda tilbodet til dei familiane Kvam herad gir tilbod til i dag og samtidig etablera arbeidstidsordningar i samsvar med arbeidsmiljølova, ser me at det avheng av at avlastarane har kan dela oppgåva med ein ektefelle/sambuar. Ikkje alle har nokon i familien å dela oppgåva med, og vil måtte avvikla avlastninga. Kvam herad reknar det som svært sannsynleg at konsekvensane er at avlastningstilbodet i institusjon må utvidast. Dette kan vera eit bra tilbod for nokon, men for dei barna som pr i dag får koma til ein familie og vera ein del av den , er dette det beste. Kostnaden for kommunen vert også vesentleg høgare dersom avlastningstilbodet skal skje i institusjon. Barnevernstenesta i kommunen har for tida 20 aktive besøksheimar, som til no har vore rekna som oppdragstakarar. Fleire av besøksheimane tek i mot søskenpar. Om lag 1/3 av desse har også ordinær stilling i Kvam herad. Formålet med besøksheimsordninga i barnevernet er å bidra til at barna får trygge oppvekstvilkår og at barnet skal ha stabil og god vaksenkontakt og kontinuitet i omsorga. Vidare er besøksheim som tiltak for at barnet skal ha ein støttande familie i sin livssituasjon. Her vert det vektlagt at barnet skal få tilbringa tid i og saman med ein annan familie. Når besøksheimane skal omfattast av arbeidsmiljølova med skisserte arbeidstidsreglar, påreknar barnevernet at fleire av besøksheimane kjem til å trekkja seg frå oppdraget. Dette gjeld hovudsakleg dei som er tilsett i kommunen og som representerer størstedelen av besøksheimane. Barnevernet i Noreg har som mål at færrast mogleg barn skal ha opphald på institusjon, men dette kan bli eit reelt og meir kostbart alternativ dersom det vert færre som kan vera besøksheim. Barnevernet i kommunen har pr i dag ikkje etablert avlastningstilbod i institusjon. Kostnadane for barneverntenesta dersom det må opprettast institusjonsavlastning, vil verta opp imot ti-dobla pr. barn pr. døgn i høve til dagens ordning. I tillegg vil ikkje barna få den verdifulle familietilhøyrsla barneverntenesta vurderer er eitt av dei viktigaste elementa i besøksheimsordninga. Norheimsund, 9. juni 2017 Arild Steine Rådmann Arbeids- og inkluderingsdepartementet Til høringen Til toppen <div class="page-survey" data-page-survey="133" data-page-survey-api="/api/survey/SubmitPageSurveyAnswer" data-text-hidden-title="Tilbakemeldingsskjema" data-text-question="Fant du det du lette etter?"
