Høyringsuttale frå Hjelmeland kommune Dato: 08.03.2017 Svartype: Med merknad Det vert vist til Finansdepartementet sitt høyringsbrev med notat av 8.12.2016 om forslag til reglar om innsyns-, klage- og søksmålsrett for kommunane i skattesaker om verdsetting av kraftanlegg, med høyringsfrist 8.3.2017. Hjelmeland kommune er vertskapskommune for fleire vasskraftutbyggingar, og har såleis måtte tåle enorme inngrep i natur og landskap. Kommunen har difor innført eigedomsskatt på verk og bruk og inntekter frå denne er av stor betydning for utviklinga av kommunen sine tenestar. Av denne grunn er Hjelmeland kommune nøgde med at det no vert føreslått å innføra reglar som gir kommunen moglegheit til å ivareta våre økonomiske interesser i saker som gjeld verdsetting av kraftanlegg. Denne verdsettinga har direkte konsekvens for kommunen sine inntekter og det er difor viktig at me har moglegheit for innsyn i grunnlaget for verdsettinga, og rett til å klage dersom me er av den oppfatning at verdsettinga har feil eller manglar. Hjelmeland kommune har likevel nokre merknadar til høyringsforslaget. Det er viktig at innsynsretten er reell og omfattar alle dokument i verdsettingssaka. Dette både fordi kommunen skal ha moglegheit til å gjera seg kjent med grunnlaget for verdsettinga ut i frå eigen økonomisk interesse, men også fordi det er kommunen som skriver ut eigedomsskatten med grunnlag i verdsettinga. Å ha tilstrekkeleg kunnskap om dokumenta som ligg til grunn for verdsettinga er av avgjerande betydning for å treffa korrekte vedtak om eigedomsskattetakst. Vidare meiner Hjelmeland kommune at innsynsretten også må gjelde opplysningar om grunnrente- og naturressursskatten. Grunnrenteskatten er del av eigedomsskattegrunnlaget for kraftanlegg, og ordlyden i lovteksten må ikkje formulerast slik at det kan vera tvil om at retten til innsyn ikkje også omfattar opplysningar som ligg til grunn for berekning av grunnrenteinntektsgrunnlaget. Dei same omsyn som ligg bak kommunen sitt behov for innsyn i eigedomsskattegrunnlaget gjer seg også gjeldande for naturressursskatten. Som mottakar av denne skatten har kommunen klar og direkte interesse i at skatten er riktig berekna. Tilsvarande synspunkt som over gjeld også for klageretten. Også denne må vera reell og vidtrekkande nok til at klageorganet skal kunne vurdere alle sider ved saka på nytt. Klageretten bør også omfatte naturressursskatten. Som vasskraftkommune er Hjelmeland medlem av Landssamanslutninga av Vasskraftkommunar (LVK). Me vil difor slutta oss til LVK sin høyringsuttale datert 1.3.2017, og støttar merknadane som kjem fram der. Med helsing Hjelmeland kommune Bjørn Laugaland, ordførar Finansdepartementet Til høringen Til toppen <div class="page-survey" data-page-survey="133" data-page-survey-api="/api/survey/SubmitPageSurveyAnswer" data-text-hidden-title="Tilbakemeldingsskjema" data-text-question="Fant du det du lette etter?"
